Quest onn ha lieu la tschintgavla Europeada – al cunfin tranter la Germania ed il Danemarc, a Schleswig. Differentas minoritads linguisticas da l'Europa giogan ballape ina cunter l'autra. Dapi l’onn 2016 as participeschan las Rumantschas ed ils Rumantschs cun dus teams – in team da dunnas ed in team dad umens.
Per il president da la CBR, Marco Cavegn, è l'Europeada ina bella chaussa. Per el saja il barat cultural impurtant, sco er ils discurs che sa dettian suenter ils gieus.
Ils giugaders e las giugadras vegnan da l'entir Grischun. Quest onn han els participants e participantas da mintgin dals tschintg idioms – per l'emprima giada.
La tschertga da giugadras e giugaders ha dentant era tschertas difficultads. Perquai che l'Europeada va in'entira emna, datti blers che n'han betg temp da far quai. Marco Cavegn declera che quai saja era gia ils davos onns stà in problem – cunzunt tar las dunnas. Perquai ch'igl ha gia pli paucas giugadras saja grev da chattar avunda participantas.
Il mument hajan els 11 giugadras – quai saja plitost pauc, di Marco Cavegn. Ma laschar davent tut la squadra da las dunnas na vegn betg en dumonda per el.
A nus èsi impurtant che tuts han ina schanza da pudair sa participar.
El na fa nagins quitads per l'Europeada 2024. I dettia adina schliaziuns – era sch'ellas sajan mo 11 giugadras. El saja en contact cun ils organisaturs ed en cas d'urgenza survegniss il team da dunnas sustegn dals indigens. Era ch'il campiunadi europeic ha lieu la medema emna na vesa Marco Cavegn betg sco dischavantatg.
L'atmosfera vegnia ad esser fitg speziala. Marco Cavegn sa legra sin quest'emna – e resta vinavant a la tschertga da giugadras per l'Europeada 2024.
