Nino Schurter è stà ditg a la testa da la cursa ensemen cun il giuven Luca Schätti. Suenter ina platta tar la roda davos è il mountainbiker oriund da Tersnaus dentant vegnì bittà enavos en la rangaziun. Quest incap tecnic ha custà ad el pliras minutas, era perquai ch’el ha stuì ir lunsch cun ina platta fin la proxima zona tecnica. La finala ha Nino Schurter terminà la cursa sco 8avel cun in retard da 2:28 minutas.
Il podest dals umens d'elita:
- Lars Forster (SUI) 1:20:33,7
- Luca Schätti (SUI) +0:00,4 min.
- Fabio Püntener (SUI) +0:32,9 min.
Lars Forster gudogna sprint final
Gudagnà l’emprima da tschintg cursas da la Bike Revolution da quest onn ha Lars Forster. Durant la segund davosa runda ha el pudì suenter a Luca Schätti ch’è stà ditg sulet a la testa. En il sprint final ha Forster lura battì piz a cup il giuven Turitgais. Cumplettà il podest sco terz ha Fabio Püntener.
Vital Albin sto ceder
Ina cursa d’emblidar èsi stà per Vital Albin. Suenter ch’el aveva gia passa ina runda retard sin ils pli sperts ha la giuria prendì el ord la cursa pervi dal grond retard. Igl è in’ulteriura terrada en questa stagiun che na funcziuna insumma betg sco giavischà. Gia tar las emprimas duas cursas da la cuppa mundiala en la Brasilia era Vital Albin stà classà lunsch davent dals top 30. Er ina terrada a Cuira ha stuì magunar Mathias Flückiger, collega d’equipa da Vital Albin. Flückiger, senza schanza sin in plaz da podest, ha dà si la cursa paucas rundas avant la fin.
Mussà ina buna cursa ha perencunter Ursin Spescha. Il mountainbiker da Sevgein è vegnì 11avel cun in retard da 3:11 minutas sin il victur Lars Forster.
Pauline Ferrand-Prévot procura cun la show
La Franzosa Pauline Ferrand-Prévot ha demonstrà sia classa e furma excellenta e n'ha laschà nagina schanza a la concurrenza. La Franzosa ha la finala triumfà avant las Svizras Alessandra Keller e Seraina Leugger.
Il podest da las dunnas d'elita:
- Pauline Ferrand-Prévot (FRA) 1:23:42,5
- Alessandra Keller (SUI) +1:08,5 min.
- Seraina Leugger (SUI) +1:08,9 min.
Ina grondiusa prestaziun en la cursa d’elita da la dunnas ha era mussà Ginia Caluori. La mountainbikera da Panaduz è vegnida 7avla cun in retard da 4:19 minutas ed uschia stada classada be paucas secundas davos Sina Frei sco 6avla.
En la categoria da las dunnas U23 ha Elina Benoit gudagnà avant Monique Halter. Las Grischunas Anina Hutter da Trimmis è vegnida 5avla e Chiara Solèr da Lumbrein 6avla. Tar ils umens U23 ha gudagnà Finn Treudler cun in avantatg da bun duas minutas sin Luke Wiedmann. Terz è vegnì Gian Bütikofer.
