SRF Sport, SRF Meteo ed SRF Cultura èn be trais dals 11 chanals che piglian cumià quests dis da lur followers.
Cun tals e sumegliants messadis communitgeschan 11 da 13 accounts dad SRF il cumià da la plattafurma enfin la mitad da matg. Sin quels chanals na possian ins betg pli cuntanscher il public, declera il pledader da medias Roger Muntwyler envers RTR.
Concentrar sin las atgnas plattafurmas
La strategia da l’affar digital prevesa da sa concentrar sin las atgnas plattafurmas sco la SRF News App, sin X restian be ils chanals cun il pli grond radius digital, pia @SRFNews ed @SRF. Ils cuntegns dals chanals che vegnan serrads duain vegnir repartids en futur sin quels chanals. Che la plattafurma X è fermamain sa midada dapi che Elon Musk ha surpiglià na saja nagin motiv, i giaja sulettamain per il motiv da cuntanscher il public e las plattafurmas terzas sco che SRF numna X dovran ins uschè u uschia be supplementar a las atgnas plattafurmas.
Cun ils 11 chanals che vegnan deactivads n'avain nus betg pli cuntanschì noss public.
Ch'er ils chanals che restan possian en futur vegnir irrelevants n'excluda SRF betg. Actualmain funcziunan quels dentant anc. Plattafurmas alternativas vegnan testadas, na vegnan dentant anc betg en dumonda. L’excepziun fa l'account che SRF Meteo ha lantschà sin Threads il cumenzament da quest onn.
