In comité lantscha ina campagna cunter l'iniziativa per la libertad e l’integritad corporala. Ella na saja betg necessaria e sias consequenzas na sajan betg calculablas. Da quai avis è il comité cunter ch'ha preschentà oz ses arguments. L'integritad corporala che l'iniziativa pretenda, saja gia daditg in dretg fundamental en la constituziun.
Gia oz na dastgia nagin vegnir vaccinà senza lur consentiment. Er tar in obligatori da vaccinar temporar per tschertas gruppas da persunas fiss in tal obligatori da vaccinar exclus, constatescha il comité Na. In obligatori fiss tenor la Lescha d'epidemias bain pussaivel en situaziuns excepziunalas.
Enfin uss na vegn l'iniziativa betg approvada d'ina maioritad da las votantas e dals votants. 55% han ditg en ina enquista da l'institut GFS Berna ch'ellas vegnian segir a dir Na a l'iniziativa.