Dapi passa 60 onns datti el, il campadi d'Estavayer-le-Lac. Situà tut idillic a la riva dal lai da Neuchâtel e gist dasper il bogn avert cun sia splagia da sablun. «La posiziun dal campadi e da la splagia è unica», di Vanessa Flack, la pledadra dal Touring Club Svizra TCS. Els hajan perquai gì grond plaschair che la vischnanca d'Estavayer-le-Lac ha surdà la gestiun ad els. Dapi l'entschatta da l’onn fa il campadi «Nouvelle Plage» ussa part dals ulteriurs 29 campadis ch'il TCS maina en Svizra.
I saja in partenadi a lunga vista cun la vischnanca, di Vanessa Flack. E perquai hajan els era gia investì en l'infrastructura dal campadi. Ils davos mais hajan els renovà l’ustaria e la stizun, en trais onns duai era l'infrastructura dals plazs da campar vegnir modernisada. Gist uschia sco quai che la vischnanca haja pretendì quai en la publicaziun uffiziala.
I duai dar in campadi cun dapli offerta turistica.
En quella publicaziun uffiziala haja la vischnanca gia definì ch’i duai dar in campadi cun dapli offerta turistica e che dapli osps duain pudair profitar dal campadi. En l’analisa hajan ins vis che la cultura da campar saja sa midada ed a quest trend vulan els dar suatientscha.”
Pauc plaschair ch'i dat midadas sin lur campadi han ils numerus affittaders stabels. En connex cun il concept nov duain numnadamain era las parcellas per quellas persunas che prendan a tschains in plaz per in'entira stagiun e laschan lur caravan ubain per part schon plitost chamonas cun terrassas ed annexas era durant l’enviern là, svanir per la pli gronda part.
In da quels hosps fidaivels è Jacques Vuille. El passenta gia dapi 60 onns mintga stad sin il campadi ad Estavayer-le-Lac. «Quai fa mal a mai. Betg mo quai, jau sun era vilà sin la vischnancas ed il TCS. Da quai na fan ins betg».
Nagina chapientscha per ils plans dal gestiunari nov e da la vischnanca ha Jean-Pierre von Burg. Suenter las inundaziuns il 2021 ha el investì blers daners per puspè metter en urden sia rulotta e la terrassa cuverta. Els avevian dumandà la vischnanca sch'els possian far quai u betg. Davart da la vischnanca hai gì num ch'els possian far sco ch'els veglian.
Trais onns pli tard hai num «Vus stuais davent». Quai n'è betg correct!
Sco el prendan 108 campaders a tschains ina parcella. Davent dal 2027 duai mo pli dar 20 da quels plazs. Tgi che dastga prender a tschains ina da quellas paucas parcellas decida lura la sort. Mo ils criteris per candidar èn pulit severs. La rulotta na dastga betg esser pli veglia che diesch onns e l’atun cura ch'il campadi ferma sias portas per l’enviern, ston ils possessurs puspè ir giu dal plaz cun ella.
Uschia sajan las reglas, di Vanessa Flack dal TCS. Mo ella chapeschia schon era che blers fetschian vess. «Igl è adina collià cun sentiments sch’ins è sa disà vid insatge. Sin midadas reageschan ins adina cun emoziuns. Mo tuttina na restan las chaussas betg adina medemas. Sche il conturn ed il martgà sa midan ston ins era s’adattar». Ad ella saja dentant fitg impurtant d'accentuar che quellas midadas planisadas sin il campadi «Nouvelle Rive» sajan vegnidas elavuradas e giavischadas da la vischnanca d'Estavayer-le-Lac.
Samuel Ménétray, il suprastant responsabel da la vischnanca, manegia lura era ch'i saja nagina surpraisa per el ch'ils interess da la vischnanca e dal affittaders sajan fitg differents.
La vischnanca sto defender ils interess da l’entira populaziun. Vis uschia èsi tut normal ch’ins n’è betg dal medem maini.”
Ina part dals affittaders stabels vulan en mintga cass s'organisar e far resistenza cunter ils plans da la vischnanca e dal TCS. In pussaivel cumpromiss fiss da dischlocar ils affittaders stabels. Mo enfin ussa n’ha la vischnanca d'Estavayer-le-Lac betg mussà grond interess da chattar ina schliaziun.