Las contribuziuns da l’assicuranza sociala dals assicurads e dals patruns per tut las trais assicuranzas socialas èn s’augmentadas per 3,2%. Il resultat positiv da las assicuranzas socialas per l’onn 2023 chaschuna in resultat da gestiun positiv da 2,8 milliardas francs per l’AVS, da 206 milliuns francs per l’AI e da 246 milliuns francs per l’EO.
Bun resultat a la bursa
Pervia dals curs creschents a la bursa cunter la fin da l’onn passà è er il resultat d’investiziun creschì per bunamain 5% l’onn 2023. L’onn 2022 era la rendita anc cun bunamain 13% en il minus. La situaziun sin ils martgads da finanzas cun augments dal curs tar bleras vaglias ha gì tranter auter in effect positiv sin la prestaziun dal fond da gulivaziun da l’AVS.
A lunga vista na tanschi betg
Independentamain da la situaziun sin il martgà na tanschan renditas positivas dentant betg per segirar a lunga vista la finanziaziun dal fond da gulivaziun da l’AVS e da l’AI. Pervi dal svilup demografic e perquai che la populaziun vegn adina pli veglia daventa il foss tranter las entradas e las expensas onn per onn pli gronda.