La stagiun da spargias ha prest cumenzà e malgrà las midadas da las temperaturas discurra Gabriela Gisler, la manadra da la fatschenta da puma e spargias Gisler, schizunt d'in start fitg bun.
Quest onn avain nus pudì cumenzar ils 12 d'avrigl cun la vendita da spargias. Quai èn 12 dis pli baud che l'onn passà.
Ma sco ch'ella di, hajan els gì cletg ch'ils dis fraids sajan vegnids pir pli tard, uschia hajan els pudì nizzegiar ils dis pli chauds dal mars. Sco Gabriela Gisler manegia, reageschan las spargias adina in pau auter sin las midadas da l'aura. Pli profund che las ragischs da la spargia van en la terra e pli chauda che quella è. Grazia a las ragischs profundas han las spargias anc adina gì avunda chaud per crescher durant questa fasa pli fraida.
La situaziun pudess esser meglra, ma en relaziun cun las temperaturas fitg bassas, essan nus tuttina surstads positivamain da la racolta.
Quai ch’è segir er nizzaivel èn las spezialas folias nairas, cun las qualas els han cuvrì las spargias. La folia protegia cunter il vent e cun agid dal sulegl sa stgauda il terren er pli spert. Sco quai che la manadra da fatschenta di, na sajan betg tut las sorts da spargias tuttina robustas. La spargia alva che crescha sut terra è per exempel pli resistenta che la spargia verda che crescha sur terra.
Ins stoppia adina far il meglier or da la situaziun, pertge il davos pled ha adina la mamma natira, resumescha Gabriela Gisler.
Or da l'archiv: