L’idea è naschida avant radund dus onns dal musicant e dirigent dal Golden Gate Symphony Orchestra and Chors Urs Leonhard Steiner ch'abita dapi 40 onns a San Francisco e durant la stad a Scuol.
A chaschun dal giubileum 500 onns Stadi liber da las Trais Lias, il fundament dal chantun Grischun, vul el ensemen cun la societad indigena «Scuol Classics» organisar il concert cun radund 180 musicantas e musicants, chantaduras e chantadurs. L’orchester surmenziunà survegn sustegn da studentas e students da differentas citads da l’Asia, organisà da l'Institut Otalpin a Ftan. Plinavant fan part radund 70 chantaduras e chantadurs indigens.
Glindesdi saira, 22 da schaner 2024, ha gì lieu l’emprim inscunter, l'uschenumnà tact inizial da quest project communabel. Il project vegn a custar radund 450’000 francs, finanzià a mez da fundaziuns, sponsurs, chantun e regiun e l’autra mesadad cun las entradas dals concerts, uschia ils organisaturs da la societad «Scuol Classics».
Ils quatter concerts han lieu dals 13 enfin ils 16 zercladur en la halla da Gurlaina a Scuol. Ils organisaturs fan quint cun radund 4'000 aspectaturas ed aspectaturs.
