En tut il chantun vegn fatg festa e celebrà il 500avel giubileum da las Trais Lias, sco per exempel quell'emna a Cazas. Là vegn avert questa fin d'emna la chombra da stgazi (Schatzkammer), ed en ina exposiziun sut tschiel avert sa regurdà dals pass impurtants dals davos 500 onns.
Daniela Andreoli è ina studenta d'istorgia e suprastanta da l'archiv cultural da Cazas ed adina puspè fascinada da l'istorgia e da la stiva veglia en il Pfrundhaus a Cazas, ch'è 70 onns pli veglia che las Trais Lias e cun quai la pli veglia stiva en il Grischun. «Sch'ins entra la stiva lura fan ins bunamain in pass 500 onns enavos», di Andreoli.
Andreoli aveva l'emprim emprendì tgirunza, silsuenter fatg la matura ed è uss cun ses 25 onns la giuvna tar l'archiv da cultura. «Jau resent respect d'entrar la stiva, da savair ch'insatgi ha vivì e sa sentì bain qua.» I saja bel che talas chaussas existan anc.
Andreoli ha chattà sia fascinaziun durant las vacanzas, en in lieu nua ch'istorgia saja vairamain schabegiada. Là haja ella l'emprima giada sentì l'istorgia. En scola n'aveva ella mai interess per l'istorgia.
Sch'ella saves, faschess Andreoli gugent in pass enavos en il passà, uschè ditg ch'ella pudess puspè vegnir enavos. I dependia dentant in pau dal temp.
